‘Koek’ vat die koek op Silwerskerm-toekennings
Cindy Swanepoel het die toekenning vir beste aktrise ingepalm vir haar rol as Christelle, terwyl Jacques Bessenger (Ryno) met die toekenning vir beste akteur weggestap het.
![Sandra Prinsloo en Cindy Swanepoel met Silwerskerm-toekennings vereer.](https://media.citizen.co.za/wp-content/uploads/2024/08/Koek-1.jpg)
Sandra Prinsloo en Cindy Swanepoel is vir hul rolle in ‘Koek’ met Silwerskerm-toekennings vereer. Foto: Showmax
Dit is goed dat nog ‘n baksel van Koek in die oond is, want hierdie reeks het die kollig gesteel en Sandra Prinsloo (Moekie) het die septer in die byspeler-kategorie geswaai. Die reeks is met vier toekennings vereer – die meeste op die kykNET Silwerskerm-toekennings vir film en TV in Kaapstad.
Christiaan Olwagen se geesteskind, met medeskrywer Wessel Pretorius en Johannes Pieter Nel as regisseur, bied ’n onverskrokke blik op die lewe in die noordelike voorstede van Kaapstad.
Cindy Swanepoel het die toekenning vir beste aktrise ingepalm vir haar rol as Christelle, terwyl Jacques Bessenger (Ryno) met die toekenning vir beste akteur en Dawid Minnaar (Kat) met die toekennings vir beste manlike byspeler weggestap het.
Toekennings vir uitmuntende vermaak
Die gesogte kykNET Silwerskermtoekennings vir Film en TV is Saterdag tydens ’n spoggeleentheid by die Kaapstadse Internasionale Konferensiesentrum oorhandig.
Vanjaar is die gesogte Silwerskermbeeldjies weer toegeken aan die akteurs, aanbieders en persoonlikhede wat tussen 1 April 2023 en 31 Maart 2024 uitmuntende vermaak op die kykNET-kanale gelewer het.
Die aand het ook erkenning gegee aan legendes in die vermaaklikheidswêreld. Hans Strydom, wat al sedert 1973 ‘n diep impak op Afrikaanse films het en tans bekend is vir sy rol as At Koster in Binnelanders, en Denise Newman, wie se rol as Bridgette in Suidooster ikonies geword het, is albei vereer vir hul lewenslange bydraes. Roberta Durrant, ‘n gerespekteerde TV-vervaardiger, is ook gehuldig vir haar lewenslange toewyding aan die bedryf.
“Film en TV is soos twee kamers van kykNET se hart,” sê Waldimar Pelser, M-Net-kanaaldirekteur: Premium-kanale. “Hulle kan nie apart gesond funksioneer nie. Om hierdie twee kunsvorme by ’n toekenningsaand te verenig, is nie net lekker nie, maar ook noodsaaklik.
“Dit is inspirerend om te sien hoeveel Afrikaanse inhoudskeppers albei mediums omarm – filmmakers wat TV maak en omgekeerd. Hierdie sukses stoot ons bedryf vorentoe. Dit is van kardinale belang om erkenning te gee aan diegene wat met min hulpbronne uitsonderlike werk op die skerm bring.”
‘n Kwarteeu van vermaak
kykNET vier vanjaar ook ’n kwarteeu van vermaak, wat hoofsaaklik op die Afrikaanse mark gemik is. Oor die afgelope 25 jaar het die kanaal ’n onmisbare deel van Suid-Afrikaanse huishoudings geword, nes biltong en beskuit.
Waldimar beklemtoon dat TV ’n spanpoging is en het groot lof vir kykNET se vennote, wie hy beskryf as meesters van storievertelling, kinematografie, sakebeplanning, ondersoekwerk, vermaak en die vind van oplossings.
“Op hierdie 25ste verjaardag bedank ons almal uit die hart vir die ure, idees, aandag aan detail en liefde wat ons met ons kykers deel. Dankie dat julle kykNET saam met ons gebou het.”
Kykers kan Sondagaand om 20:00 op kykNET (DStv-kanaal 144) inskakel om die oorhandiging van die Silwerskerm-toekennings te sien, die sterre se uitrustings te bewonder en saam die dramatiese oomblikke van onverbloemde vreugde te beleef.
Kyk hier na die lokprent van die feesgunsteling
Die wenners is elke kategorie
DIE WENNERS IN DIE TV-KATEGORIE IS:
Beste byspeler in ’n komedie
- Taktiek – Mandri Sutherland
Beste aanbieder in ’n vermaaklikheidsprogram
- Wie word ’n miljoenêr? – Rian van Heerden
Beste aanbieder in ’n leefstylprogram
- Ommighellie – Frazer Barry
Beste nuweling in ’n telenovela of sepie
- Wyfie – Mienke Ehlers
Beste akteur in ’n komedie
- Taktiek – Bennie Fourie
Beste aktrise in ’n komedie
- Magda Louw – Desiré Gardner
Beste aanbieder in ’n realiteitsprogram
- In die sop – Bertus Basson
Beste ensemble-aanbiederspan
- Toks en Tjops – Breyton Paulse, Hamilton Wessels, Rika Nieuwoudt, Rikus de Beer, Janina Oberholzer, Jean de Villiers, Jonathan Mokuena, Jannie du Plessis, Tommy Dickson (Chef Vaatjie)
Beste byspeler in ’n telenovela of sepie
- Wyfie – Marguerite van Eeden
Beste manlike byspeler in ’n drama
- Koek – Dawid Minnaar
Beste vroulike byspeler in ’n drama
- Koek – Sandra Prinsloo
Beste aanbieder in ’n joernaalprogram
- Prontuit – Kabous Meiring
Beste aanbieder in ’n dokumentêre realiteitsprogram
- Grondpad geloof – Dana Snyman
Beste aanbieder in ’n geselsprogram
- Hannes aan huis – Hannes van Wyk
Beste aanbieder in ’n aktuele program
- In gesprek – Lourensa Eckard
Beste akteur in ’n drama
- Koek – Jacques Bessenger
Beste aktrise in ’n drama
- Koek – Cindy Swanepoel
Beste aktrise in ’n telenovela of sepie
- Suidooster – Jill Levenberg
Beste akteur in ’n telenovela of sepie
- Arendsvlei – Jody Abrahams
Persoonlikheid van die Jaar
- Rachelle Fourie
DIE WENNERS IN DIE SPEELFILM-KATEGORIE IS:
Beste draaiboek van ’n speelfilm
- Som van twee – Simoné Pretorius
Beste oorspronklike klankbaan in ’n speelfilm
- Som van twee – Snoozefest, Hunter Kennedy
Beste klankontwerp in ’n speelfilm
- Die Kwiksilwers – Sound Surgeon Studios, Morné Marais
Beste kinematografie in ’n speelfilm
- Hier.Na – Ebrahim Hajee
Beste redigering in ’n speelfilm
- Som van twee – Dries Scholtz
Beste grimering en haarstilering in ’n speelfilm
- Die Kwiksilwers – Hanri Neethling
Beste kostuums in ’n speelfilm
- Hier.Na – Ayesha Khatieb
Beste manlike byspeler in ’n speelfilm
- Som van twee – Pierre Breytenbach
Beste vroulike byspeler in ’n speelfilm
- Hier.Na -Trudy van Rooy
Beste regie in ’n speelfilm
- Som van twee – Simoné Pretorius
Beste akteur in ’n speelfilm
- Som van twee – James Borthwick
Beste aktrise in ’n speelfilm
- Hier.Na – June van Merch
Beste speelfilm
- Som van twee
DIE WENNERS IN DIE KORTFILMS-KATEGORIE IS:
Beste draaiboek van ’n kortfilm deur ’n opkomende filmmaker
- Marie se laaste dag – Mercy Kannemeyer en Lourensa Eckard
Beste regie van ’n kortfilm deur ’n opkomende filmmaker
- Die Skynwerper – Dewet van Rooyen
Beste kortfilm deur ’n opkomende filmmaker
- Marie se laaste dag
Beste kinematografie in ’n kortfilm
- Marie se laaste dag – Tom Marais
Beste redigering in ’n kortfilm
- Baas se honne – Leon Visser
Beste akteur in ’n kortfilm
- Die Skynwerper – Ben Albertyn
Beste aktrise in ’n kortfilm
- Selah – Erica Wessels
Beste Shotgun-kortfilm
- Baas se honne
DIE WENNERS IN DIE DOKUMENTÊR-KATEGORIE IS:
Beste kort dokumentêr
- Maak stil die geblaf
Beste regie in ’n kort dokumentêr
- Maak stil die geblaf – Marisa van Tonder
Beste redigering in ’n kort dokumentêr
- Vergeet van my – Pierre-Arnold Theron
TOEKENNINGS VIR LEWENSBYDRAE:
- Denise Newman (aktrise)
- Hans Strydom (akteur)
- Roberta Durrant (TV-vervaardiger)
FEESGUNSTELING
- Die Kwiksilwers
For more news your way
Download our app and read this and other great stories on the move. Available for Android and iOS.