Hartseer lê soos die winter oor eMalahleni met die nuus dat die stad se geliefde tuin-tannie dood is.
Lena de Lange of Lena Tuindienste soos sy op almal se selfone gestoor was, is Sondag, 30 Junie, dood.
Sy het hartversaking gekry nadat sy vroeër in Junie in die hospitaal opgeneem was nadat sy baie siek geword het. Sy was agt dae lank op ’n ventilator.
Lena en haar tuindienste was die afgelope 28 jaar bekendes in die stad. Sy het in eMalahleni grootgeword en na haar egskeiding een kantsnyer (edge-trimmer) en een grassnyer by haar boetie geleen en haar besigheid begin.
Haar kennis van plante was onuitputbaar.
Sy het graag met haar ‘kinders’, die twee papegaaie en ’n ringnek gespog. Die geveerde ‘kinders’ is na ’n voëlskuiling in Tzaneen waar hulle mooi aanpas.
“Al bloei ons harte, gaan ons haar met liefde onthou. Sy was so bitter baie siek die laaste maand. Ons sal Lena elke dag sien wanneer ’n nuwe blommetjie blom of as die gras té vinnig groei,” het Stella Beukes, Lena se skoonsussie gesê.
Lena sou op 14 Julie 61 jaar oud geword het.
’n Liefdesdiens word op 13 Julie gehou om Lena se lewe te vier.
Die besonderhede sal later bekend gemaak word.
Het jy ’n storie om te vertel?
Stuur vir ons ’n epos na info@witbanknews.co.za of bel ons by 013 656 2490
• Vir meer brekende- en gemeenskapsnuus, besoek gerus ons webtuiste.
• Jy kan ons ook volg op sosiale media platforms: Facebook, Twitter of Instagram
HET JY GEWEET?
Kliek op die woorde wat in kleur uitgelig is om meer te lees oor verwante temas.
