Bokke-slagting deur honde laat eienaar verslae
Die wildsbokke in die Vikela Game Breeders-projek is elke dag in gevaar.
Die bokke-slagting by Vikela Game Breeders kan nie in woorde omskryf word nie.
Mnr. Dick Jacobs, eienaar van Vikela Game Breeders, het Vrydag, 13 Augustus deur die plaas gery waar die slagting plaasgevind het en het met moeite die emosie teruggehou tydens die rit.
SIEN DIE VIDEO HIER
Twintig wildsbokke wat swart wildebeeste, springbokke, blesbokke, gemsbokke en Scimitar-gemsbokke insluit, is verlede week deur honde doodgebyt. Daar word bespiegel dat die honde van Spring Valley afkomstig is waar die honde gebruik word om te jag.
Dié informele nedersetting grens aan die plaas waar daar besig is met ’n wildteelprogram.
Terwyl Dick padlangs langs die grensdraad van die plaas afgery het, kon die geknipte draad gesien word.
Net ’n entjie in het WITBANK NUUS twee mans afgeneem wat hout gesny het op die plaas en met die hout deur die draad geklim en op ’n uitgetrapte voetpaadjie terug nedersetting toe gestap het asof dit die natuurlikste ding in die wêreld is om te doen.
“Duisende rande is al spandeer om die draad te elektrifiseer en daar waar hulle dit knip, weer reg te maak. As ons staalpype inplant, word dit oornag weggedra,” het Dick moedeloos gesê.
’n Entjie verder is ’n nes met volstruiseiers gevind, die wyfie was skoonveld.
“Sy is moontlik deur die brakke verjaag. Die eiers is nie veilig nie, die brakke sal seker vannag terugkom en hulle ook opvreet,” het Dick gesê.
Die wind wat in die stofpaadjies op die plaas tiekiedraai en met vlae sand dans het die trane op Dick se wange droog gewaai.
“Hierdie projek is iets wat ek en die konsortium, wat die plaas aan my verhuur, vir die gemeenskap wou teruggee. Ek wou die mooi van die natuur, wat ek van kindsbeen af saam met my pa beleef het, met ander deel…”
Die gewilde Parkrun het voor die nasionale inperking Saterdae op die plaas plaasgevind. Die jagtersvereniging het gereeld veldopleiding op die plaas aangebied en Dick wou die plaas toeganklik maak vir die publiek.
Dick het die meeste van die wildsbokke nou verkoop en ander na veiliger reservate toe geskuif.
Selfs hierdie oefening jaag hom duisende rande uit die sak. Pyle om die wildsbokke te verdoof is nie goedkoop nie, dan moet vervoer, registrasie en permitte bygereken word.
“Ek probeer doen wat ek kan, en op dié stadium moet ek die mees koste-effektiewe oplossing vind,” het hy gesê.
Dit was juis op hierdie plaas waar die uiters skaars Egiptiese Aasvoël verlede jaar kom kuier het.
LEES MEER OOR DIE EGIPTIESE AASVOëL HIER
Deel jou nuuswenke met ons:
Telefoon: 013 656 2490
WhatsApp: 060 866 8682
E-pos: wtbnews@mweb.co.za
Volg ons ook op:
Instagram, Twitter, Witbank News App, Facebook page, Witbank News Breaking
