*Die storie het eerste in die gedrukte weergawe van Vaalweekblad verskyn. Kry ons gedrukte koerant elke Vrydag vir al die jongste nuus eerste.
MEYERTON – Die Jeep Klub van Suid-Afrika en Klipdraai Karavaanpark het tydens die Legends Charity Drive & Topless Day op Erfenisdag broodnodige gelde ingesamel vir JC van den Berg (26), ‘n Suid-Afrikaner in die V.S.A. wat ‘n hartoorplanting moet kry.
Eienaars van Jeeps, Ford Mustangs en Harley Davidsons het op die oggend van 24 September by Town Square in Constantia Kloof, Roodepoort byeengekom en van daar af na die Klipdraai Karavaanpark in Meyerton gery, waar hulle die dag saam om die braaivleisvure geniet het, met kunstenaars wat heeldag opgetree het.
Volgens Michiel Nieuwoudt, eienaar van Klipdraai Karavaanpark, gaan die geld wat tydens die dag ingesamel is vir JC van den Berg, ‘n 26-jarige man van Viljoenskroon in die Vrystaat, wat R13m kort vir ‘n pasaangeër, sowel as ‘n hartoorplanting in die Verenigde State van Amerika.
Van den Berg, wat met ‘n H-2A-visum na Amerika is om te gaan boer, is op 22 Mei in die waakeenheid van die Ochsner Medical Centre in New Orleans opgeneem.
Hy kort ‘n hartoorplanting.
Die operasie beloop glo bykans $750 000 (sowat R13m).
Nieuwoudt het almal bedank wat aan die dag deelgeneem het en laat weet dat die teiken bereik is.
“Dit gaan goed met JC. Hy kan ongelukkig in hierdie stadium geen werk verrig nie. Hy stap ‘n entjie en moet dan eers gaan sit. Hy is egter vol moed en vol gees,” het Nieuwoudt aan Vaalweekblad gesê.
Die Jeep Club SA is ‘n Suid-Afrikaanse klub wat voorsiening maak vir eienaars van Jeep en Willy voertuie.
