“Hierdie opeenhoping staan tans op 3 186 in die sowat 130 staatslykshuise landwyd. KwaZulu-Natal met 1 527 en die Oos-Kaap met 526 blyk die grootste probleemgebiede te wees,” sê die VF Plus in ‘n mediaverklaring.
Die hoofoorsake hiervoor is glo gebrekkige identifikasie en naasbestaandes wat bloot nie die oorskot opeis nie.
Dan is daar ook onwettige immigrante wat nie geïdentifiseer kan word nie, en bydra tot die probleem.
Ander faktore is die agterstand en vertraging in die vervoer en ontleding van DNS-monsters, swak kwaliteit vingerafdrukke, korrupsie waar naasbestaandes moet betaal om gestorwenes te kry, uitstaande toksikologiese verslae, die vertraging in begrafnisse en verassings weens ‘n tekort aan grafspasie, begrotingstekorte en krematoriums wat nie voldoende funksioneer nie.
“‘n Kerntaakspan sal onverwyld op die been gebring moet word tussen die regering en rolspelers in dié bedryf om die probleme daadwerklik te behandel. Dit is reeds ‘n krisis en kan nie gelaat word om te vererger nie,” meen die VF Plus.
Die party het ook daarop gewys dat die snelgroeiende bevolking sake aanhou sal versleg.
Dit wil egter voorkom of daar nog nie gesprekke of samewerking tussen die regering en die betrokke rolspelers is om ‘n oplossing te bewerkstellig nie.
Van die oplossings wat die VF Plus voorstel, is die implementering van ‘n digitale vingerafdrukstelsel wat kan help met die identifisering van oorledenes wat by staatslykshuise opdaag.
“Samewerking moet formeel geskied tussen die nasionale regering en al die rolspelers, insluitend die nasionale gesondheidslaboratoriumdiens asook provinsiale en plaaslike regerings. Laasgenoemde is waar die probleem eindelik lê aangaande krematoriums en onvoldoende grafspasie,” verduidelik die VF Plus.
“Bestaande staatslykshuise en krematoriums moet dringend opgegradeer word en nuwes moet gebou word. Meer grafspasie sal beskikbaar gestel moet word en daar sal op nasionale vlak gehelp moet word met begrotingstekorte vir die instellings,” sluit die VF Plus af.
