Dit het ek verlede Sondag besef toe Rocco se vertoning: Boeremusiek Rocco-styl by die Etienne Rousseau-teater aangebied is.
Kort nadat die vertoning begin het was intens dankbaar dat daar goeie ondersteuning vir die klas van vertoning was, want sulke talent verdien na regte ‘n groot gehoor.
Dit was ‘n uitsonderlike, professionele vertoning deur een van die beste pianiste wat Suid-Afrika nog opgelewer het.
Daarby saam het hy die verhoog gedeel met twee uiters ervare musikante: Lizelle le Roux op viool en Hansie Roodt jr. op kitaar. ‘n Wen-kombinasie!
Saam het hulle ou bekende keurspele van Jim Muller en musiek van legendes soos Nico Carstens en Hansie Roodt sr. se musiek weer laat herleef.
Maar alles in Rocco se kenmerkende styl, en gepas om mense met nuwe oë na boeremusiek te laat kyk.
Daar was natuurlik ook van Rocco se eie komposisies wat die hele ervaring baie besonders gemaak het.
So tussendeur die soet klanke was daar ook tyd vir Rocco om van sy komiese ervarings en paar grappe te deel.
Die grappe was goed (en soms lekker stout), maar dit het die gehoor laat skaterlag.
Na afloop van die vertoning kon daar nie soos voorheen CD’s in die voorportaal gekoop word nie, maar daar was geleentheid vir Valies om Rocco te ontmoet en selfs ‘n foto of twee te neem.
