Valies rol ‘n bol vir ‘n goeie doel
Die Vaaldriehoek se sakelui het saamgestaan om fondse vir borskanker in te samel
VANDERBIJLPARK – Alle borsverwante grappies en stoute woordspelings was toelaatbaar tydens die OFM Bowling for Boobies liefdadigheidsgeleentheid wat Donderdag, 3 Oktober by die Vanderbijlpark rolbalklub aangebied is.
Dié prettige inisiatief vorm deel van die Pienktober-veldtog wat jaarliks in Oktober plaasvind om bewustheid oor borskanker te bevorder.
Ons land se skonergeslag word aangemoedig om gereeld ondersoeke te laat doen.
Met spanname soos Double D’s en HakunaMa-Tieties was dit net ‘n voorsmakie wat die geleentheid sou oplewer.
Soos hulle sê hoe later hoe kwater. Die fondse wat ingesamel is, is aan KANSA geskenk.
Die geleentheid het sakelui en gemeenskapslede van regoor die Vaaldriehoek gelok om ‘n goeie saak te ondersteun.
Die fondse wat ingesamel word help met mediese uitgawes en bied ondersteuning aan pasiënte wat deur die finansiële en emosionele uitdagings van borskanker gaan.
Bowling for Boobies bied nie net hulp aan slagoffers nie, maar skep ook ‘n samehorigheidsgevoel in die gemeenskap.
Pienktober is ‘n simbool van hoop in die stryd teen borskanker.
