Burger Box se deure na 64 jaar gesluit
Vele mense het hulle eerste "dates" by Burger Box gehad
VEREENIGING – Sy onthou haar eerste romantiese afspraak met Bles asof dit gister was.
Die 76-jarige Leonie Bridges, weduwee van die ontslape ikoniese sanger Bles Bridges, erken dat sy bewoë geraak het toe sy op Facebook lees dat die Burger Box Padkafee in Vereeniging na 64 jaar sy deure gesluit het.
“Ek en Bles het die Sondag nadat ons ontmoet het ‘n melkskommel daar gaan drink. Lemmetjie melkskommels… dit was sy gunsteling,” vertel sy. Hoewel sy deesdae in Pretoria woon kuier sy dan en wan vir haar kleinkinders in Vaalpark.
Sy en Bles het in 1967 by ‘n kersfunksie by haar pa se werk ontmoet. “Bles se orkes het daar opgetree. Ek het op ‘n swaai gesit met my neef se kind op my skoot.
Bles-hulle was besig om hulle instrumente uit te laai. Ek het later verneem hy het vir Dolf Slabbert gesê: “Sien jy daardie girl? Ek gaan met haar trou.
Dolf het later ons troukar ook bestuur.” Die toe 19-jarige Leonie is later die aand deur haar neef aan Bles voorgestel.
Nadat hulle ‘n paar liedjies gedans het, het Bles haar telefoonnommer gevra.
“Hy het my nommer op sy hand geskryf toe dog ek nee wat hy gaan my nie bel nie.
Daardie dae was daar nie selfone nie. Hy het die volgende dag geskakel en my broer gevra om met sy sussie te praat, want hy het my naam vergeet.
Hy het kom kuier en my uitgevat vir ‘n melkskommel by Burger Box,” vertel sy. Leonie en Bles het jare lank in Drie Riviere Oos, en later in Vandermerweskroon naby Unitaspark gebly en gereeld saam met hulle kinders, Victor en Sonette by die padkafee gaan eet.
“Ons gunsteling was savoury mince on toast en natuurlik lemmetjie melkskommels. Vandag kan ek nie ‘n lemmetjie melkskommel in my lyf kry nie,” skerts sy.