Pret en plesier by Lente Stap/Draf
Dit was 'n vrolike mengelmoes wat die 7de die pretstap in Sasolburg aangedurf het.
SASOLBURG – Die NG Gemeente 4 Ankers was Saterdag van vroeg al in rep en roer. Die braaivleisvure is aangesteek, die pannekoekdeeg geroer en die glimlagte was warm al was die oggendluggie koel.
Dit was ‘n bonte skare wat aan hierdie jaar se Lente Stap/Draf deelgeneem het. Van jongelinge in stootkarretjies, honde aan leibande tot meer ernstiger atlete het die twee, vier of agt kilometer roetes aangepak.
Die lede van MS Hoop en hul getroue ondersteuners was ook daar en het met groot geesdrif en glimlagte klaargemaak.
Harry Prinsloo, een van die MS-lyers, kon die roete in sy nuwe rolstoel voltooi. Hy het die rolstoel ontvang nadat MS Hoop en die gemeenskap ingespring het om hom met nuwe wiele te help.
Almal wat klaargemaak het, het medaljes ontvang en dit sluit die viervoetiges in.