VANDERBIJLPARK – Vyf Valies het onlangs nuwe vlakke behaal in die President’s Award of South Africa-program wat aan jongmense tussen 14 en 19 jaar die geleentheid bied om in verskillende areas betrokke te raak en te groei.
Dié Suid-Afrikaanse jeugontwikkelingsprogram is gekoppel aan die internasionale Duke of Edinburgh Award.
Die studente kan op hul eie tyd die brons, silwer en goudvlakke voltooi. In elke vlak moet daar aan sekere vereistes voldoen word in vier hoofkategorieë, naamlik dienswerk, vaardigheid (wat onder andere musiek, sport en drama insluit), fisiese aktiwiteit en avontuur.
Met elke vlak word die moeilikheidsgraad meer en word daar meer ure dienswerk van die studente vereis.
Die plaaslike studente van Kairos Jeug wat nuwe vlakke voltooi het, is groep jeugleier Anri Wenhold (goud), Line van den Berg (silwer), Daniël Wenhold (silwer) en Minette en Renate Steurer (albei brons).
