Ons weet wat ons weet: Wat gebeur by die Olimpiese Spele?
Laerskool D.F Malherbe in Vanderbijlpark se jongspan weet nie regtig wat is die Olimpiese Spele nie, maar hulle kan jou 'n ding of ses vertel van die Springbokke.
Wat gebeur by die Olimpiese Spele en hoe lyk ‘n Springbok of is dit ‘n springbok?
Gerda Bruinette het by die juniors van Laerskool D.F Malherbe gaan hoor en ja, as mens tussen ses en agt jaar oud is, dan mag jy rondspring tussen onderwerpe.
Christiaan Labuschagne
Ek weet nie wat is dit (Olimpiese Spele) nie. ‘n Springbok lyk soos ‘n bok. Springbokke is normale mense, maar hulle is ekstra groot, sterk en vinnig.
Melinke van Vuuren
Skud net kop oor die Olimpiese Spele. ‘n Springbok het ‘n swart streep oor sy maag en is ligbruin met kort horings. Dis nie ‘n groot bok nie. Die Springbokke het Springboktruie en hulle is groot.
Scott Henderson
Trek skouers op oor die Olimpiese spele, maar… ‘n Springbok is swart en wit en ligbruin. Die Springbokke speel in groen hemde met wit broeke. Hulle is Springbokke want hulle speel vir Suid-Afrika en is ekstra groot.
Alana Grobler
Ek weet wat is die Olimpiese Spele. Daar’s hokkie, gimnastiek en dans van al die lande. Ek dink ek gaan gimnastiek wees want ek doen gimnastiek en dans. Ek hou nie van rugby nie. Hulle skree te veel in die huis as die rugby aan is.
Mikala Schoeman
‘n Springbok is klein, bruin en wit en kan goed spring. Die Springbokke is normale mense wat net baie goed kan rugby speel. Ek skree vir die Springbokke.
Lourens Oosthuizen
Is die Olimpiese Spele die atletiek goed? Ek kyk meer rugby. Dis ‘n bokkie wat maak of hy spring en dan is hy gevries in die lug op die Springbokke se hempies. Die Springbokke is baie goed in rugby. Net een is bietjie baie lank. Eben Etsebeth. Die ander is normale grote.
