VANDERBIJLPARK – Dit gebeur bitter selde dat die Portuguese Saal tot teenaan sy dakkappe met toeskouers gepak is. Vrydag, 19 Julie was een van daardie dae toe meer as 900 toeskouers die plaaslike 90.6 FM en NJR Staal Vereeniging se CheerOff Cheerleading kompetisie bygewoon het.
Enigeen wat dit bygewoon het sal beaam dat dit beslis nie ‘n mors van tyd was nie.
Parkering was ‘n nagmerrie, maar dit was op die ou einde alles die moeite werd. In die hoërskole-afdeling het Hoërskool Driehoek ‘n spogvertoning gelewer en is as die wenner van die kompetisie gekroon.
In die laerskole-afdeling het Laerskool Kollegepark van Vanderbijlpark en Laerskool Vryheidsmonument van Vereeniging, mekaar behoorlik die stryd aangesê, maar die Monnies het uiteindelik die beoordelaars sodanig beïndruk dat hulle met die louere weggestap het.
