VANDERBIJLPARK – Sy verjaar 28 Julie dan is sy sewe. Maruche Herbst is opgewonde, want haar oom Les Sherrin (amptelik haar ma, Nadine se oom) kom kuier.
Vir hom sal sy enige iets doen. Die oom wat altyd glimlag en positief is. Haar oom Les wat al lank met kanker stoei en onlangs die slegte nuus ontvang het dat die kanker na sy lewer, kolon en longe versprei het. Fase 4-longkanker.
Die skokkende nuus het Maruche laat wonder wat sy kan doen. Verlede week het sy haar ouers gevra of sy haar hare mag sny en dit kan skenk sodat ‘n pruik vir kankerpasiënte gemaak kan word.
Haar hare het byna in die middel van haar rug gehang, maar sny wou sy dit sny.
Sy en haar ma het op die internet gekyk en gesien hoe bly dit mense maak as hulle pruike kan kry nadat hul hare weens die kankerbehandeling uitgeval het.
“Ek het my hare vir my oom gesny, sodat hul wigge (sy bedoel ‘n wig, (Engels vir pruik) kan maak.
Mense is baie bly as hulle die haar-hoede kry,” verduidelik Maruche grootoog met haar babahondjie, Katharina, op haar skoot.
“Ek was nie bang of hartseer om my hare te sny nie. Dit het my bly gemaak omdat ek geweet het dit gaan ander mense bly maak,” vertel sy.
Ma Nadine was die een wat van pure trots trane gestort het toe die skêr haar dogter se lang hare tot ‘n kort bob sny.
“Haar ponie was presies 25 cm. Dis wat nodig is om ‘n pruik te maak. Maar korter hare kan ook geskenk word, want dit word gebruik om pruike op te vul,” verduidelik Nadine.
Maruche se hare is by Olivia van Revive Haarsalon gesny. “Olivia was fantasties. Ons het lekker gelag en baie foto’s geneem.”
Maruche se grootste wens is dat meer mense hul hare sal sny en sal skenk sodat mense wat kanker het “weer bly kan wees.”
