VANDERBIJLPARK. – Saterdag, 22 Junie het Rock en Heavy Metal ondersteuners van vroeg by Sylviavale Heritage Village saamgetrek.
Die geleentheid was CHURN360 en het gedien as afskop vir Groinchurn se groot toer in SuidAfrika en Europa.
Groinchurn is 30 jaar gelede deur Christo Bester, Mark Chapman en Sergio Christina in Vanderbijlpark gestig.
“Ons was uit en uit ‘n Vaaldriehoek-band. Ek was van Vanderbijl, Mark van Vereeniging en Sergio van Sasolburg,” onthou Christo.
Die groep het naam gemaak met hul grindcore rock, nie net in SuidAfrika nie, maar ook in Europa. Hul beroepe en lewens het teen 2011 hul in verskillende rigtings geneem.
Hul bewonderaars het hul nie vergeet nie. Christo het hierdie jaar besluit om die band weer lewe te gee ter viering van die 30 jaar wat hul musiek al gehoor kan word.
Met Koos van der Watt en Emile Hoogenhout wat Mark en Sergio se plekke ingeneem het, het hy ‘n toer na onder andere, Duitsland, Pole en die Tsjeggiese Republiek georganiseer.
Mark Hopkins, van THE THR3 PROJ3CT (‘n instrumental prog band) en ‘n jarelange Groinchurn bewonderaar, het van die toer gehoor en die perfekte geleenheid gesien om die band na hul wortels terug te bring.
Die uiteinde was ‘n konsert van formaat met THE THR3 PROJ3CT, Armed to Disarm en Groinchurn wat headbanging in menige konsertganger uitgebring het.
THE THR3 PROJ3CT is in 2019 gestig en bestaan uit Mark, Stephan Pieterse en Graeme Churcher. Mark het in Vereeniging grootgeword en beskou Sergio Christina steeds as sy mentor.
Armed to Disarm is ‘n plaaslike death metal band bestaande uit Jannie Coetzee, Juan (Prawn) Strijdom, Toni Marques, Shaun Strijdom en stigter Ryan van Greunen.
Die band het al twee enkelsnitte uitgereik en is tans besig met opnames vir hul eerste album.
