Gerhard Steyn bekoor senior burgers
Lede van die Meyerton Senior Sosiale Klub het die oggend saam met Gerhard Steyn geniet.
MEYERTON. – Die Meyerton Senior Sosiale Klub het op Donderdag 23 November die jaar op ‘n hoë noot afgesluit met ‘n funksie by Lion’s Creek in Meyerton waartydens die sanger Gerhard Steyn opgetree het.
Steyn, bekend vir sy treffer “Baby Tjoklits”, het ou harte vinniger laat klop en voete laat stamp met sy aansteeklike ritme en musiek.
Hy het tydens die optrede verklap dat hy en sy vrou deesdae in Vaal Oewer woon en dat hulle die lewe in die Vaaldriehoek geniet.
Die Meyerton Senior Sosiale Klub is ‘n onafhanklike nie-winsgewende sosiale klub met ongeveer 160 lede en bestaan al 40 jaar.
Die klub het oorspronklik as die Immanuel Klub vir Senior Burgers bekend gestaan, maar die naam is later verander na Meyerton Sosiale Senior Burger Klub.
Die klub se leuse is: “die lewe begin na 60″.
Mense wat belangstel om by die klub aan te sluit kan vir Sarie Louw ‘n WhatsApp stuur by 072 100 0486.
