Dwelmverslaafde loop openlik rond met naald in die arm
Inwoners vrees vir die veiligheid van hul kinders
Theresa Ross van Sasolburg het vroeër vandag video’s geneem van ‘n man wat blykbaar in ‘n oop veld naby Laerskool Fonteine tussen ‘n klomp rommel woon en openlik met ‘n naald (vermoedelik ‘n dwelmmiddel) in sy arm rondloop. In die video kan gesien word hoe hy handgebare maak terwyl hy met homself gesels. Dit is duidelik dat die arme mens dringend hulp nodig het. Inwoners is besorgd oor hom, maar is nog meer bekommerd oor hul kinders wat gereeld deur die area moet loop.
Theresa skryf:
Ek weet nie regtig hoe rapportering aan Public Eye werk nie, maar ons het vroeër vandag hierdie man gerapporteer met die versoek aan PE Sasolburg vir hulp om hom te verwyder.
Hy sit en spuit dwelms sonder enige vrees, oop en bloot. Dit is erg genoeg dat die dwelmgebruikers die hele wandellaan oorgeneem het. Daar is nie ‘n manier dat hierdie net gelos kan word nie.
Dit is agter Zee Kafee/Fonteine skool, waar heelwat skoolkinders moet loop, dit is GEVAARLIK! Help ons asseblief met raad oor hoe om hierdie mense hier weg te kry, hulle word net meer!
