Dit was ‘n saam sing, groot kuier, Country fees
Dit was 'n Country-fees van formaat. Lees meer...
VEREENIGING – Dit was ‘n middag om te onthou. Vyf van die land se beste Country sangers en die bekende Rodeo Girls het saamgetrek vir ‘n Country fees soos min.
Lion Jay & Friends het verlede Sondag by Tuscany Inn vir baie lag, saamsing en hoendervleis oomblikke gesorg.
Van die toeskouers het so ver as Hartebeespoort en Benoni gery om Lion Jay (Leon Jacobs), Corné Rust, Suzette Jacobs, Collin Dee, Will Jordan en die Rodeo Girls in aksie te sien.
Die vertoning wat skuins na 11:30 afgeskop het, het kuier-kuier tot vlak voor 16:00 geduur.
Van ou Countrygunstelinge tot by ABBA treffers is gesing. Will Jordan het weer bewys hoekom hy al vir jare vele se nommer een sanger is.
Sy nabootsing van onder andere Elvis Presley, Neil Diamond, Pavarotti en Steve Hofmeyr het almal aan die lag gehad en terselfdertyd laat kop skud oor sy ongelooflike talent.
Lion Jay het ook sy nuwe enkelsnit vir die eerste keer voor ‘n gehoor gesing. I will never find somebody like you behoort eersdaags die treffersparades te tref.
Naas die Rodeo Girls (Lientjie Bayman, Christine Deetlefs en Tessa Booysen) se uitgewerkte danspassies het van die ander toeskouers ook gereeld hul draai op die dansvloer gemaak.