‘Bid asb. vir ons pa’
VANDERBIJLPARK - Emil Krügel (49), 'n pa van drie, is in kritieke toestand in die intensiewe sorgeenheid. Sy gesin vra vir die gemeenskap se gebede en ondersteuning.
Emil het sowat drie weke gelede wakker geword om te vind dat hy van sy skouers tot tone verlam is.
Hy is in Mediclinic Emfuleni opgeneem en later met Guillain Barre Syndrome gediagnoseer. Dit is ‘n siekte wat die immuunstelsel aanval en aftakel.
“Dit is met ‘n swaar hart wat ek deel dat my pa tans in ‘n kritieke toestand in die ICU is. Hy sukkel met ‘n erge nierinfeksie,” het sy oudste seun, Chris laat weet.
“Ons is diep dankbaar vir die uitstorting van liefde, ondersteuning en gebede wat ons tot dusver ontvang het.
“Jul vriendelike woorde en gedagtes was ‘n bron van ontsaglike vertroosting vir ons familie gedurende hierdie moeilike tyd.
“Ons versoek vriendelik jul volgehoue gebede. Jul geloof en ondersteuning beteken die wêreld vir ons.
“Ons gesin gaan deur ‘n moeilike tyd en ons het jul ondersteuning nou meer as ooit nodig. Deel asseblief hierdie boodskap wyd en syd.
“Die krag van gebed is geweldig, en ons glo in die krag van ons gemeenskap,” vra Chris.
Klik op die foto hieronder om die vorige berig oor Emil te lees.
Die gesin kort ook geldelike ondersteuning vir al die mediese onkostes. Indien u kan help klik asb. op BackaBuddy.
