Ibuyela Ogwini i’World Cup’
Kwethulwa lo mcimbi amaCiko kaMaskandi angoBahubhe kanye neThwasa Lekhansela bawubize ngeWorld Cup yabo besho nokusho ukuthi iwona mcimbi abazigqaja ngawo okungowangasemakubo.
![](https://images.caxton.co.za/wp-content/uploads/sites/52/2024/08/489184fe-11a3_76571.jpg)
AKHOMBISE eyisimanga amaCiko kwethulwa ngokusemthethweni umcimbi wabo obanjwa minyaka yonke, i-Ugu Maskandi Festival (UMF).
Lo mcimbi ohlelwa yi-Ugu Broadcasting Services (UBS) wethulwe ngokusemthethweni ngoLwesihlanu ebusuku e-Ugu Sports and Leisure Centre, eGamalakhe ngasePort Shepstone. Uzobanjwa kuyo le nkundla yezemidlalo mhlaka 28 Septhemba, kanti amathikithi alomcimbi asevele aqalile ukuthengiswa.
Kwethulwa lo mcimbi amaCiko kaMaskandi angoBahubhe kanye neThwasa Lekhansela bawubize ngeWorld Cup yabo besho nokusho ukuthi iwona mcimbi abazigqaja ngawo okungowangasemakubo.
Kulokwethulwa ngokusemthethweni kwalomcimbi, kudedelwe uhla olunohlonze lwabaculi abazonandisa ngosuku olukhulu. Kubona kubalwa uBahubhe, Ithwasa Lekhansela, Mbuzeni, Ichwane Lebhaca, Phuzekhemisi, uGatsheni, Jumbo, Sminorf, Stability, Khuzani, Igcokama Elisha, kanye nabanye abaningi abanohlonze.
Abahleli balomcimbi ozobe usubanjwa ihlandla lesine bathe baqinisekisa ukuthi iningi labaculu liphuma kuso lesi sifunda Ugu. Okhulumela i-UBS, uMelusi Khwela uthe ngalomcimbi baningi abaculi asebebakhile.
“Into esiyenzile kulonyaka sihambe yonke indawo sithungatha ithalente elizoba yingxenye ye-Ugu Maskandi Festival. Angisho ukuthi kuhlu lwalonyaka 85 % uphuma la Ogwini. Abaphathi hlelo abazobe bephethe umcimbi cishe bathathu abasuka ngaphandle, abayisishiyagalombili baphuma la Ogwini,” kuchaza uKhwela.
Kanti uBahubhe uthe kuzobe kungadlalwa kulonyaka abantu mabahambe bayojima. “Ngikhululekile ngizoba ufakazi ukuthi ngizobe ngikhona. Kulonyaka akudlwa nengane. Nayo iWorld Cup layikhona. Angilwi ke noThukela kodwa sihlezi sihamba amaWorld Cup oThukela. Ayikho into engijabulisa noThukela luzoke lusuke luze kwiWorld Cup (yasOgwini),” kuchoma uBahubhe.
Ukuchoma kwakhe kunanelwe yiThwasa Lekhansela, elicele omasipala uMzumbe noMdoni ukuthi nabo benze njengeRay Nkonyeni noMuziwabantu baxhase lo mcimbi.
“Asikaze sibe nomcimbi kaMaskandi ngisho omncane awuphumeleli. Bafwethu sicela niyomemezela nibatshele ukuthi sicela behle, umcimbi ongabandlululi muntu lo kodwa ke umehluko ukuthi kukhona thina la,” kubeka uThwasa Lekhansela.
HAVE YOUR SAY
Like the South Coast Herald’s Facebook page, follow us on Twitter and Instagram