Uqhubeka kahle owenkundla eMzinto
Ngesikhathi evakashele leya nkundla yezemidlalo uMeya u Cele-Luthuli ubephelezelwa uSotshwebu kamasipala uSithandiwe Zulu nabafike kuleyankundla bengalindelwe muntu ngenhloso yokuzibonela umsebenzi oqhubeka kuyo.
![](https://images.caxton.co.za/wp-content/uploads/sites/52/2024/08/qube_65780.jpg)
USUYA ngasemaphethelweni umsebenzi wokwakhiwa kwenkundla yezemidlalo yaseMzinto, uMzinto Sports Ground njengoba sekutshalwa utshani abazogijima kubo abadlali bebhola likanobhutshuzwayo.
Lena ngenye yezinkundla ezisezingeni eliphezulu ezakhiwe umasipala waseMdoni kanti kulindeleke ukuthi iqedwe maduze nje.
IMeya kamasipala uMdoni, uMbali Cele-Luthuli uvakashele leya nkundla yezemidlalo eyakhiwayo kamuva nje eyobona umsebenzi oqhubekayo wokwakhiwa kwalenkundla yezemidlalo ekulindeleke ukuthi ibe sezingeni eliphezulu.
Ngesikhathi evakashele leya nkundla yezemidlalo uMeya u Cele-Luthuli ubephelezelwa uSotshwebu kamasipala uSithandiwe Zulu nabafike kuleyankundla bengalindelwe muntu ngenhloso yokuzibonela umsebenzi oqhubeka kuyo.
“Sijabulile ngomsebenzi esiwubone kulenkundla wokuqedelwa kwayo usonkontileka obeqhubeka nomsebenzi ngesikhathi sifika kuyo. Sikujabulele ukuthola usonkontileka esebenza kahle elandela izivumelwano esinaso naye zokwakhiwa kwalenkundla yezemidlalo yaseMzinto. Kuqhubeka kahle ukwakhiwa kwalenkundla esigabeni sokuqala,” kusho Cele-Luthuli.
UCele-Luthuli uthe isigaba sesibili sokwakhiwa kwalenkundla sizoqala kuwo lo nyaka zimali ngoba seyibekiwe imali yaso kanti sizoqala kungekudala le sigaba sesibili sokwakhiwa kwayo.
“Kuzokwakhiwa ezinye izindawo zokudlala kulenkundla yezemidalo bese kufakwa nocingo kulesigaba sesibili esizoqala kungekudala. Sizimisele ukwakha inkundla yezemidlalo esezingeni eliphezulu nezoba yisizinda sezemidlalo kubantu baseMzinto bonke,” kusho uCele-Luthuli.
UMeya uCele-Luthuli uthe ukusebebenza kahle futhi ngokugcwele kwalenkundla yezemidlalo kuzosiza kakhulu intsha yaseMzinto neyaseMdoni ukuthi izithuthukise kwezemidlalo, ikwazi ukukhiqiza abadlali abasezingeni eliphezulu nabaziphilisa ngezemidlalo.
HAVE YOUR SAY
Like the South Coast Herald’s Facebook page, follow us on Twitter and Instagram