Danksy ‘n ooreenkoms wat die Suid-Afrikaanse Brouerye (SAB) met die regering bereik het, is 130 miljoen liter bier nou nie meer verlore nie.
Volgens die ooreenkoms kan die SAB nou wel sy verpakte voorraad bier van sy brouerye na sy stoorplek vervoer. Verlede week is gesê dat dié bier weggegooi sal moet word as dit nie vinnig vervoer kon word nie.
Die bier sal in die komende weke vervoer word.
Die probleem met die bier het gekom nadat die brouproses al voor die inperking begin het, en die bier nou gereed was om vervoer te word, maar met die huidige inperkingsregulasies is dit nie moontlik om alkohol te versprei of te verkoop nie.
Gevolglik sou dit beteken het dat die bier letterlik weggegooi sou moes word wat ‘n verlies van R150 miljoen sou wees. Ook die regering sou R500 miljoen verloor aan aksynsbelasting op die bier wat eers betaal word as dit verpak is.
SAB het vroeër ook gewaarsku dat sou die bier weggegooi moes word dit nie net skade vir die omgewing sou beteken nie, maar ook duisende werksverliese veroorsaak het in die verspreidingsketting.
