Blou masjien kook, kruip al nader na die titels toe
Eerstespan en o.16's bespreek plek in uitspeelrondte na wegholoorwinning oor Wonderfontein.
Die o.16- en die eersterugbyspan van Hoërskool Roodepoort het albei hul plek in die uitspeelrondte van die Goue Leeus-liga vir klein skole bespreek na hulle spoggerige oorwinnings oor Wonderfontein die afgelope naweek.
Roodies se eerstespan was vuurwarm en het hul opponente met 64-22 afgeslag terwyl die o.16’s sewe keer gaan druk het om 45-5 te seëvier.
Die skool van Wonderfontein het dié dag beslis klippe gekou, veral die eerstespan wat, kan jy glo onoorwonne was totdat hulle op 31 Mei met Roodies swaarde gekruis het. Die Roodies-tweedespan het ook gewen – met 28-12.
Wat die netbal aanbetref het sewe uit die agt Roodie-spanne gewen met net die eerstespan wat 8-42 verloor het.
Roodies se rugbyspanne pak Vrydag vir Florida Park High en ‘n wegholsege is die enigste voorspelling.
Nog uitslae (slegs A-spanne):
• Roodies o.14A 21-1 Wonderfontein
• Roodies o.15A 22-2 Wonderfontein
• Roodies o.16A 14-5 Wonderfontein
• Roodies o.17A 10-5 Wonderfontein
• Eerste-span 8-42 Wonderfontein
