Florries vind hul voete in voormalige Coke-reeks
Noordheuwel-kragmeting 'n moet wen vir Florries.
Die span van Hoërskool Florida het hul voete gevind in die Roodepoort Rugbyklub Hoërskole-reeks na ‘n spog oorwinning van 42-10 oor Potch Volkskool op Maandag 5 Augustus.
Alhoewel die sege vir Florries broodnodig was, is hul volgende en laaste wedstryd teen Noordheuwel op Woensdagaand 7 Augustus ‘n moet-wen een; dit aangesien Florries reeds in hul eerste kragmeting – teen Menlopark – met ‘n telling van 18-5 die spit afgebyt het.
Menlopark, Groep B se voorloper en beslis een van die gunstelinge om die Afdeling A-kroon te dra, het Maandagaand (5 Augustus) hul segetog voortgesit deur gemaklik met 72-2 met Noordheuwel af te reken. Dit was die Pretorianers se tweede agtereenvolgende wegholoorwinning.
Wat Potch Volkskool aanbetref raak dinge vir hulle nie makliker nie. Hulle laaste wedstryd is teen die einste Menlopark op Woensdag 7 Augustus om 5.30nm en dit sal ook ‘n moet-wen kragmeting wees.
Slaag Potch Volkskool daarin om Menlopark te verras, en sou Florries teen Noordheuwel vasval, is dit neusie verby vir Florries.
Ander interessante uitslae in Afdeling A sluit in die Groep A-kragmeting tussen Marais Viljoen en HTS Witbank. HTS Witbank het na ‘n agterstand van 8-0 goed teruggekom en die wedstryd met 13-8 gewen.
