Helderkruin leerder wys haar staal by Eisteddfod

Laerskool Helderkruin se eie Clara Baard het haar talent ten toon gestel by die RACA Eisteddfod en weggeloop as die kategorie wenner vir graad twee ongedramatiseerde poësie en het ook twee diamant toekennings vir ongedramatiseerde poësie en mondeling ontvang.

“My hart bars van trots. Om voor ‘n gehoor te praat is reeds moeilik vir sommiges. Dan nog om ‘n voorbereide kultuur stuk uit te oefen waar jy beoordeel word, dit is nog moeiliker. Doen dit dan op die ouderdom van agt en jy bewys dat senuwees oorkom kan word en dat mens kan streef na jou drome,” het Celeska, Clara se ma gesê.

Sy het verduidelik Clara leer vinnig, so om stukke te memoriseer is nogal maklik, maar wat bietjie langer vat is die afronding. Binne ‘n week is sy egter reg om dit op te voer, maar sy voeg by hulle probeer haar soveel as moontlik tyd gee en dan skerp hulle dit net op voor die optredes.

“Ek het hard geoefen saam met mamma, die skool en my klas,” het Clara bygevoeg.

Volgende hoop hulle om haar meer blootstelling te gee aan kuns en te kyk waar haar talent uitstaan, waarop hulle dan wil fokus sodat sy haar passie kan voortleef.

Op die vraag of sy volgende jaar weer wil deelneem het Clara dadelik geantwoord ‘ja’, Celeska het bygevoeg, “Die prestasies het beslis haar selfvertroue ‘n groot hupstoot gegee en haar honger gemaak vir die volgende jaar se optredes.

“Trek jou geduldige hoedjie aan, kinders leer op hul eie tyd, maar wanneer hulle dit snap kom alles perfek bymekaar. Gee ook net altyd jou beste en doen dit met trots,” het Celeska advies gegee.

Sy het afgesluit, “Baie dankie aan Laerskool Helderkruin wat kultuur so goed bevorder en aan Clara, ons is vreeslik trots op jou en die uitmuntende prestasies.”