Vet pret en musiek genot by Tekkiesfees
Feesgangers sowel as die kunstenaars betrokke is gevra om soveel tweedehandse tekkies of skoene moontlik in te samel vir liefdadigheid.
Hoërskool en Laerskool Florida het die gemeenskap se tekkies figuurlik aan die brand gehad by hulle Tekkiesfees die naweek.
Die skool, in samewerking met Solidariteit se Helpende Hand, is die stigters van die fees en het gemik daarop om ‘n dag vol familie pret en goeie musiek aan te bied, maar die hoofdoel van die dag was dat feesgangers, sowel as die kunstenaars betrokke, soveel tweedehandse tekkies of skoene moontlik skenk vir liefdadigheid.
Die skoene was oorhandig aan Helpende Hand waar dit verdeel sal word tussen die behoeftiges in hulle sorg.
Kunstenaars soos Coenraad Joubert, Jan Matthys van Lill, Barto Swiegers, Droomsindroom, Irene-Louise van Wyk en Louw van den Heever het by die fees opgetree.
Die fees was perfek vir families met klein kinders – daar was talle springkastele en speelgoedstalletjies om hulle besig te hou sowel as kosstalletjies met ‘n verskeidenheid warm verversings om die koue weer te tem.
