Roodepark Mark ‘n groot sukses

Die eerste week van November is al sedert 2016 ‘n hoogtepunt op Roodepark Skool se kalender, en vanjaar was geen uitsondering nie toe die skool hul jaarlikse mark aangebied het.

Dié mark het van Maandag, 31 Oktober tot Vrydag, 4 November by die skool plaasgevind. Markgangers kon uitsien na ‘n groot verskeidenheid handgemaakte produkte insluitend meubels, kombuisbykomstighede, rustieke dekor en natuurlik tuisgemaakte etes en lekkernye onder andere.

Bywoners kon kieskeurig kibbel oor pryse en rondsoek tot hul die perfekte Kerskopie kon opspoor. Daarna het hulle die geleentheid gehad om by die koffiekroeg ‘n beker boeretroos te geniet en hul honger te stil.

Volgens geleentheidorganiseerder en skoolhoof, René van der Merwe vorm die uitstalling deel van die leerders se kurrikulum.

“Dit kurrikulum bepaal dat leerders markbare produkte moet maak. Dis daarom die perfekte geleentheid vir die leerders om hul produkte – wat gemaak is met die hulp van ons onderwysers – uit te stal en te verkoop,” het sy vertel.

Van der Merwe meen dis ‘n voorreg om weereens die skool se vaardighede aan die gemeenskap ten toon te kon stel. Sy wil ook graag almal bedank wat die geleentheid ‘n sukses gemaak het, asook almal wat die mark ondersteun het.