Ons Plek Horison, het op Vrydag, 3 Februarie pannekoeke by die Gereformeerde Kerk Ontdekkers in Discovery verkoop as deel van ‘n fondsinsamelingsprojek vir hulle nasorgsentrum.
“Ons is ‘n nie-winsgewende besigheid, saam met Helpende Hand, wat minderbevoorregte families en kinders help,” het Ons Plek sentrumbestuurder Ivana Meyer verduidelik.
Hulle het ‘n verskeidenheid pannekoeke verkoop, onder andere gewone kaneel en suiker pannekoeke, maalvleis pannekoeke, melktert-vulsel pannekoeke en dan pannekoeke met ‘n brandsous.
“Altesaam het ons 305 bestellings gekry, van die ouers, lede en die gemeenskap om ons,” het Ivana vertel.
Die inisiatief sal een keer ‘n maand plaasvind en alle fondse sal na die nasorgsentrum gaan.
Vir meer inligting of om uit te vind wanneer die volgende pannekoeke verkoopsdag plaasvind, kontak Ivana by 073 606 5671.
