Roodie Akademie ontvang spesiale besoekers
Die leerders kon selfs die ambulanse van binne bekyk.
Die skoolvakansie het onlangs op ‘n hoë noot afgeskop toe ER24-personeel ‘n spesiale besoek by Roodie Akademie Naskoolsentrum afgelê het.
Op Donderdag, 24 Maart het die betrokke paramedici met groot passie gedemonstreer hoe om suurstof toe te dien, hoe om ‘n wond te verbind en hoe om ‘n beseerde persoon te stabiliseer en op ‘n draagbare bed te plaas.
Leerders het hul ore gespits om seker te maak dat daar nie ‘n brokkie inligting verlore gaan nie. Volgens sentrumhoof Tammy Buys, was dié opwindende besoek deel van hul vakansieprogram.
Die leerders kon selfs die ambulanse van binne bekyk, en die besoek is afgesluit toe die paramedici die kinders se vrae beantwoord het en met hulle gesels het.
“Ons het die waarde van dié mense besef en dit is definitief hulle vir wie jy in jou uur van nood aan jou sy sou wou hê,” het Tammy vertel.
“Ons sê ook graag dankie vir ER24; die kinders het dit vreeslik geniet! Dit was nie net groot pret nie, maar leersaam ook.”
