Pragkuns te siene in pragtuin
Kuns In Die Tuin al sedert Oktober 2013 'n treffer-uitstalling in Roodepoort.
Verlede Saterdag (9 April) het kunstenaars baie pret gehad toe hulle hul nuutste skilderye en kunswerke in die pragtuin van Annamarie Heuser uitstal.
Heuser het dié Kuns In Die Tuin-projek in 2013 begin in haar eie tuin om kunstenaars ‘n plekkie in die son te bied. Sy het destyds gesê sy voel kunssinniges het nie, in Roodepoort ten minste, ‘n plek om saam te kom, te kuier en idees uit te ruil nie. Buitendien, sou hul elders uitstal, vra gallerye kommissie op hul werk en kry hul nie hul prys nie. Heuser het toe besluit om haar tuin oop te stel en dit wat dié kunstenaars verkoop se winste is hul eie. Daarby bied haar Franse teetuin met elke uitstalling lawenis en kuierplek vir beide kunstenaars en ander besoekers.
Die afgelope Saterdag het minder besoekers as gewoonlik gelok, wat Heuser toeskryf aan die onvoorspelbare weer. Tog het ten minste drie nuwe uitstallers aangesluit by die geselskap, wat onderskeidelik uit Wilropark, Krugersdorp en Klein Helderkruin Aftree-oord hul skeppinge gebring het. Nadine Duvenage van Krugersdorp-Noord het haar hout-gebasseerde juwele soos blits verkoop. Hannie Wessels uit Wilropark geniet skilder as ‘n stokperdjie en het pragtonele uit Australië, waarvan sy self foto’s geneem het, geskilder. Valerie Rautenbach geniet die afgetrede lewe in Klein Helderkruin en neem weeklikse kunsklasse, waar sy die meerderheid van haar skilderye voltooi het.
Ander kunstenaars het Heuser se broer, Wouter Coetsee, sowel as Magda van Heerden en Alta Colyn ingesluit.
Heuser hoop om met die volgende uitstalling, wat vir Augustus beplan word, selfs meer kunstenaars en kunsliefhebbers te lok.
Kunstenaars wat nog saam wil uitstal, en enige ander belanghebbendes kan Annamarie Heuser kontak by 082 480 5248.
Het jy dalk meer inligting rakende dié storie? Stuur gerus vir ons ‘n e-pos na roodepoortrecord@caxton.co.za (sluit asseblief kontakbesonderhede in) of skakel ons by 011 955 1130.
Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes Randfontein Herald,  Krugersdorp News en Get It Joburg West Magazine
Besoek ook ons Facebook, Twitter en Instagram blaaie om jou stem te laat tel!
