Sasol Hydra-Arc behaal driekuns

Al drie die Sasol Hydra-Arc-rugbyspanne van Secunda Rugbyklub het verlede naweek moeilike wedstryde gespeel, maar wel al hul wedstryde gewen.

Die eerstespan het teen Witrivier se eerstespan in ’n tuiswedstryd geseëvier met ’n spogtelling van 53-25 en het nie minder nie as nege drieë aangeteken.

Witriveir het drie drieë aangeteken.

Jannie van der Merwe was weer ’n staatmaker op die veld en het nie net twee drieë gedruk nie, maar ook vier drieë verdoel.

Juandré Kleynhans het ook uitgeblink met vier drieë, terwyl Steven Jacobs, Izan Green en Ruan van der Colf elkeen ’n drie gedruk het.

Fanie Booysen en Deon (Lip) Greef is as manne van die wedstryd aangewys.

Die tweedespan het ook op Secunda teen Witrivier gespeel en het die besoekers behoorlik oorrompel met ’n telling van 62-15.

Die tuisspan het nege drieë aangeteken en die besoekers drie.

Jacobus Byleveldt, Brandon Niemand, Ruben Lello, Steyn van der Heever, Devin Pretorius, Johan van Schaik en Xabder Young het elkeen een drie gedruk.

Carlo Kleynhans het beslis sy skopskoene aangehad en het nie net vyf drieë verdoel nie, maar ook een strafdoel oorgeskop.

Neoi (Fats) Maliehe en Carlo Kleynhans is aangewys as die manne van die wedstryd.

Die derdespan het op Bethal teen Ermelo se tweedespan gespeel en ook hier het die Secunda-manne die dorp se naam hooggehou.

Die eindtelling was 22-10 met vier drieë vir Secunda en twee vir Ermelo.

Pieter Odendaal en Munisani Mashaba is aangewys as die manne van die wedstryd.

Happy Selepe het twee drieë gedruk en Pieter Odendaal en Dumisane Mashabe elkeen een.

Ruan Dickenson het een drie verdoel en so bygedra tot sy span se oorwinning.

Eerskomende Saterdag speel die eerste- en tweedespanne tuis teen Ferros en die derdespan tuis teen Middelburg.

Toeskouers is welkom om die spanne te kom ondersteun voor die eindstryd op 15 Julie.

Die rugby begin Saterdag om 1nm en die eerstespan skop om 4nm af.

Vir meer nuus besoek gerus ons ander webblaaie.

Standerton Advertiser & Highvelder

”Like” ons op Facebook en volg ons op Twitter en Instagram.