SECUNDA – Sasol Hydra-Arc Rugbyklub se eerste en tweede rugbyspanne het hul eerste vriendskaplike wedstryde vir die 2017-seisoen tydens die Nigel Rugbydag wat op Saterdag, 4 Maart op Nigel gehou is, gespeel.
Daar is nie ’n enkele punt teen een van die twee Sasol-spanne aangeteken nie.
Sasol 1 het teen Sasolburg se eerstespan gespeel.
Sasolburg 1 was die streeksligawenners van 2016, maar Sasol Hydra-Arc se eerstespan was net te sterk en het die manne in blou met 73-0 geklop.
Die eerstespan se puntemakers was Micheal van Vuuren, Juan (Shrek) Kotze, Ruan van der Colf, Willa Martin (kaptein) en Fanie Booysen met een drie elk.
Pieter Streicher en Jannie van der Merwe het elkeen twee drieë gedruk.
Werries Joubert, Steven Jacob en Christaan Wessels het elkeen een drie verdoel en Theuns Kruger twee en Fanie Booysen drie.
Sasol 2 het kragte met Sasolburg 2 gemeet. Die eerste punte vir Sasol Hydra-Arc is binne die eerste twee minute van die spel aangeteken.
Hulle het hul wedstryd met 47-0 gewen.
Die puntemakers vir die tweedespan was Christo Erasmus, Johan van Schaik, Ruben Lello, Jannie van der Merwe, Righ Potgieter, Mark Jacobs en Wezi Manda, wat een drie elk gedruk het.
Johan van Schaik het een drie verdoel en Jannie van der Merwe vier.
Die Sasol Hydra-Arc Rugbyklub verwag groot dinge van hul spelers dié seisoen en as verdedigende streeksligawenners, het die klub baie om te bewys.
Hul eerste groot tuiswedstryd vind op 18 Maart plaas en almal is welkom om dié sterk en gedissiplineerde spanne in aksie te sien.
