Karl voltooi twee kruistogte deur Suid-Afrika

EVANDER – Mnr. Karl Dewinnaar (41) het al twee keer met ’n kruis deur Suid-Afrika geloop.

Hy het bykans 3 500km afgelê tydens sy twee kruistogte en hy glo die Here het hom gelei om dié reis aan te pak.

Hy glo die Here het hom geroep vir straatbediening.

Hy het sy eerste kruistog in Januarie vanjaar aangepak en vanaf Ermelo na Kaapstad geloop.

Hy het toe kuslangs geloop.

Hy loop met sy kruis, ’n twee-mantent en ’n rugstak met klere en ’n paar ander besittings in.

Hy slaan sy tent op langs die pad of slaap in huise as mense vir hom blyplek aanbied.

Met sy tweede staptog vanaf Ermelo na Port Elizabeth, het hy weer by Kaapstad gestop, maar hy het deur die binneland, onder andere Gauteng, gestap.

Terwyl mnr. Dewinnaar al die kilometers te voet aflê, reik hy orals waar hy gaan uit na haweloses, dwelmverslaafdes en prostitute.

Mnr. Dewinnaar was self aan dwelms verslaaf voordat hy tot bekering gekom het en daarom het hy ’n passie om na dié mense uit te reik en die evangelie aan hulle te verkondig.

Hy lewer ook sy getuienis by skole, kerke en enige geleentheid waarheen mense hom nooi soos wat hy deur die land met sy kruis stap.

Daar is baie uitdagings tydens dié staptogte, maar mnr. Dewinnaar glo dit is wat die Here hom geroep het om te doen.

“Dit was nie altyd maklik nie. Ek is al drie keer beroof en soms kan ’n mens net elke tweede dag stort, maar ek het dit klaar gemaak,” het hy gesê.

Tydens een van sy staptogte was hy op pad na Potchefstroom toe hy ondervind het die Here sê vir hom hy moet in ’n grondpad afdraai.

“Ek het my foon gevat en op Google Maps gekyk en gesien dit is ’n plaaspad, maar dit kom ook by Potchefstroom uit, dit was net ’n langer pad.

“Ek het nie verstaan hoekom ek op daardie pad moes loop nie, maar ek was gehoorsaam en het daar af gedraai.

“Dit was warm en daar was baie vlieë en stof en daar het net so elke halfuur ’n kar verby my gery.

“Toe stop een van die motors en ’n groot boer het my gevra of hy ’n paar minute van my tyd kon kry.

“Ek het gesê dis reg en hy het my toe vertel hoe sy lewe inmekaar geval het, sy boerdery het weens die droogte nie goed gedoen nie, dit het nie goed in sy huwelik gegaan nie en hy was op pad om te gaan selfmoord pleeg.

“Hy het my sy vuurwapen gewys wat reeds in sy bakke gelê het en vir my gesê hy het gebid en die Here gevra vir ’n teken of ’n rede hoekom hy nie moes selfmoord pleeg nie en toe sien hy my loop met my kruis en het dit as ’n teken gesien.”

Op mnr. Dewinnaar se kruis staan in groot, vet letters: ‘Jesus is lief vir jou’.

Hy het homself en sy eie identiteit gevind tydens dié staptogte.

“’n Mens leer baie.

“Ek het geleer ons lewe in ’n land waar mense steeds omgee vir ander en hoop het vir hul toekoms.”

Hy het ook ’n paar bekendes soos Jimmy Abbott, voormalige bokser wat deesdae sy eie kerk het, en die akteur en aanbieder, Scot Scott, tydens sy staptogte raakgeloop.

Mnr. Dewinnaar het na sy staptog homself op Evander gevestig en hy glo dit is waar die Here hom nou wil gebruik vir straatbediening.

Hy het, saam met ’n groep mense, ’n groep genaamd ‘Overcomers Through Christ’ gestig wat toeiletware en ander benodighede insamel en aan haweloses uitdeel.

Dié groep is ook op Facebook en belangstellendes kan by dié groep aansluit as hulle wil help of betrokke wil raak.

Mnr. Dewinnaar wil steeds twee keer maandeliks met sy kruis vanaf Evander na Secunda stap.

Hy het, toe hy op sy staptogte was, gesien hoe streng ander dorpe is as dit by bedelaars kom.

“Daar is kennisgewings teen die verkeersligte en lamppale op dat mense beboet of vervolg sal word as hulle vir bedelaars geld gee.

“Hulle het dan ook sentrums op dié dorpe waar haweloses kan stort en kos kan kry en ’n takie kan verrig in ruil vir ’n bord kos of ’n stort,” het mnr. Dewinnaar vertel.

Sy visie is om iets soortsgelyk op Secunda en die omgewing te begin.

“Ons wil ook nie vir die haweloses net kos en warm klere gee nie, maar ook kos vir hul siel en gees,” het hy vertel.

Hulle het reeds skenkings van Bybels gekry wat hulle binnekort aan die haweloses gaan uitdeel.

Hy is ’n nutsman en soek tans werk in die omgewing.

Mnr. Dewinnaar werk graag met sy hande en maak juweelkissies en speelgoedtrokke vanuit hout.

Sien sy video hier.