MNS-lyer van Secunda sterf 10 maande na hy dorp verlaat

Mnr. Marthinus (Boela) Deetlefs (35), is gister, 8 Junie dood.

Ridge Times het verlede jaar oor hierdie jong pa en enkelouer berig nadat hy met motorneuronsiekte (MNS), dieselfde siekte waaraan die Springbok-rugbyspeler Joost van der Westhuizen gely het, gediagnoseer is. Sy lewensverwagting was toe tussen twee en drie jaar.

Mnr. Deetlefs en sy seuntjie, Juandré (8) het juis toe besluit om in Julie 2019 na sy ouers op Melkbosstrand te verhuis waar hulle hom sou versorg het.

Hy het op Secunda grootgeword en het as ’n spesialis-elektromeganikus by Sasol Mynbou gewerk. Mnr. Deetlefs sal onthou word vir sy betrokkenheid by Laerskool Goedehoop waar Juandré tot verlede jaar op skool was en rugby gespeel het.

Boodskappe van medelye en huldeblyke stroom in op sosiale media.

Mnr. Deetlefs word as’n besondere mens met ‘n heerlike sin vir humor beskryf wat tot kort voor sy dood nog grappies met die mense om hom gemaak het.

Lees ook: Secunda-pa tref voorsorg vir toekoms met MNS