BETHAL – Mnr. Mattheüs Pieterse het op Sondag, 26 Januarie, 90 geword.
Hy het dié spesiale geleentheid saam me sy vrou, me. Ria Lotz (86), hul kinders, kleinkinders, vriende en geliefdes in die NG Kerk Bethal-Oos-gemeente se saal gevier.
Mnr. Pieterse was in 1966 een van die stigterslede van dié gemeente.
Hy is in 1930 op Amersfoort gebore en het op dié dorpie sy laer- en hoërskoolloopbaan voltooi.
Hy het na skool saam met sy pa gaan boer op die plaas Klipplaatdrift buite Amersfoort en het dit ook geniet om rugby te speel.
Hy het sy vrou, wat destyds ‘n sekretaresse by die laerskool was, ontmoet en die egpaar is op 19 Maart 1955 getroud.
Hulle vier vanjaar hul 65ste huweliksherdenking.
Hulle het destyds as jong getroudes na Bethal verhuis en op die plaas Haarlingen geboer totdat hulle afgetree het.
Die egpaar woon sedert 1999 by Palmoord Ouetehuis op Bethal.
Hulle het twee dogters, me. Leana du Plooy en me. Alta Swanepoel, twee skoonseuns en ses kleinkinders.
Mnr. Pieterse het vroeërjare baie insette op Bethal gelewer en was baie betrokke in die gemeenskap, sy kerk, die skole en landbou.
Hy is vandag steeds ‘n ouderling in die kerk.
Sy dogter, me. Du Plooy, het gesê hy word geken en gerespekteer in die gemeenskap as ‘n mens wat met dankbaarheid lewe en hy weet waar sy krag vandaan kom.
“Alle eer aan die Here vir soveel genade deur my pa se lewensjare,” het me. Du Plooy gesê.
Sy het gesê vir haar ouers se 65ste huweliksherdenking gaan die familie almal saam uiteet om dit te vier.
