SECUNDA – Me. Soleil Kruger, ’n maatskaplike werker wat in spelterapie spesialiseer, het onlangs ’n professionele ondersteuningsgroep, Secunda Helping Hearts, begin.
Dié groep is spesifiek vir maatskaplike werkers, sielkundiges, spraakterapeute, arbeidsterapeute, fisioterapeute, biokinetikuste, laktasiekonsultante, dieetkundiges, oudioloë, beraders en lees- en spelterapeute.
Me. Kruger het sowat ’n jaar gelede vanaf Rustenburg na Secunda verhuis en haar werk as spelterapeut behels kinders wat deur trauma is of emosionele probleme of gedragsprobleme het.
“Ek help hulle dan om dit te verwerk deur speletjies met hulle te speel,” het sy gesê.
“Om te speel is kinders se natuurlike taal.”
Me. Kruger het vir lank as ’n maatskaplike werker op Rustenburg gewerk, maar het gesê universiteit kan ’n mens nie op die uitdagings wat op ’n maatskaplike werker in die regte lewe wag, voorberei nie.
Sy het later haar hand aan die onderwys probeer en by ’n privaatskool op Rustenburg gewerk voordat sy en haar man, mnr. Stefan Kruger, na Secunda verhuis het.
Me. Kruger se twee dogtertjies van 10 weke en drie jaar oud, hou haar voltyds besig as sy nie terapie gee nie.
Sy het Secunda Helping Hearts begin sodat professionele mense mekaar kan ontmoet en om dit makliker te maak om kinders wat hulp nodig het, na sielkundiges, spraakterapeute, en ander te verwys.
Me. Kruger beplan Secunda Helping Hearts se eerste byeenkoms Vrydag, 24 Augustus by Eat-a-Lot.
Toegang beloop R200 per persoon en sluit ’n ete in.
Sy het mense wat in al die bogenoemde beroepe betrokke is, genooi om dié byeenkoms by te woon.
Vir meer inligting, skakel haar by 064 655 8186.
