Rowers slaan toe by Ackermans op Evander

Ses mans het Ackermans op Evander vanmiddag omstreeks 3nm beroof.
Hulle het sowat 15 kliënte en personeellede in die stoorkamer toegesluit en een man glo geslaan.
Hulle het een van die personeellede beveel om al die selfone in ’n kartondoos te sit en gevlug met sowat 400 selfone en R3 000 kontant.
Me. Martie Erasmus was in Ackermans toe die rooftog plaasgevind het en het gesê: “Ek het die rowers besig gehou met die Woord en Jesus aan hulle bedien en lofprysing gedoen.
“Hulle het vir my selfoon gevra, maar ek het hom in my sak weggesteek en gesê ek het nie ’n selfoon in my handsak nie, net my gebedsboekie hulle kan maar kyk dan kan ons sommer saambid.”
Die rowers het haar en haar twee kleinkinders wat onderskeidelik agt en 11 jaar oud is, in die stoorkamer ingestamp en een van die rowers het sy vuurwapen vir haar gewys.
“Ek het net twee rowers gesien, een het twee vuurwapens gehad en die ander een het een gehad.
“Ek het vir hulle gesê dit is verkeerd om te steel en Jesus is lief vir hulle.
“Hulle het vir my gesê hulle steel nie van ons nie, maar van die onderneming en die onderneming het versekering, toe het ek gesê dit is steeds verkeerd.”
Me. Erasmus het skelm boodskappe van haar selfoon gestuur vir hulp terwyl sy en die ander in die stoorkamer aangehou is.
“Die ander mense was baie bang en wou my slaan elke keer as ek op my selfoon getik het,” het sy vertel.
“My kleinseun het verskriklik gehuil toe wou hulle hom skiet, toe sê ek nee, dan moet hulle hom eerder laat gaan.
“Ek het die heeltyd gebid en lofliedere gesing.”
Evander Polisie was op die toneel en AfriForum Teks Buurtwag het op die oproep gereageer.