SECUNDA – Mnre. Hendrik Keyser (62) en Koos Coetzee (66) is hard aan die oefen vir hul staptog in Maart vanaf Secunda na Stellenbosch.
Die doel van die staptog is vir kankerbewusmaking en om geld vir Kansa in te samel vir toerusting wat gebruik word om te help om moesies te ontleed.
“Ons wil vroue aanmoedig om hulself gereeld vir borskanker te laat toets en mans moet hulle vir prostaatkaner laat toets,” het mnr. Keyser gesê.
Mnr. Keyser het in 2007 vanaf Secunda na Stellenbosch vir kankerbewusmaking gestap nadat sy vrou, me. Cora Keyser, in 2006 aan borskanker dood is.
Die twee mans het Saterdag, 29 November vanaf Secunda verby Evander en terug gestap en 30km voltooi.
Hulle stap daagliks tussen 15km en 20km en wil probeer om elke naweek 30km te stap ter voorbereiding.
“Ons doen nou stamina-oefening,” het mnr. Coetzee gesê.
Hulle sukkel om borge vir stapskoene te kry en as enige iemand hulle wil borg, kan hulle Kansa skakel by 017 631 2857.
“Die skoene is duur en ons moet gereeld skoene ruil,” het mnr. Keyser gesê.
“Die gemeenskap sal ook by die nuwe toerusting waarvoor ons geld insamel, baat,” het mnr. Coetzee gesê.
“Kankerpasiënte kan langer leef as hulle voorkomend optree.”
