Laurika Rauch nader plaaslike juweliers

SECUNDA – Mnre. Rikus Kotze (21) en Nico van der Merwe (25) het onlangs vir Laurika Rauch ’n hangertjie ontwerp wat sy na Skouspel toe sou dra, maar omdat dit met een van die ander kunstenaars se rokke sou bots, kon Rauch dit nie dra nie.

“Dit was vir ons ’n groot eer om vir haar ’n hangertjie te kon ontwerp,” het mnr. Kotze gesê.

Dié twee ontwerpers het toe wel vir Rauch ’n armband ontwerp.

Dit was die eerste keer dat ’n bekende kunstenaar mnre. Kotze en Van der Merwe genader het en Rauch is nie ’n juweel-mens nie.

“Sy dra nie graag juwele nie en dit was vir ons ’n geleentheid wat oor ons pad gekom het wat ons nooit gedink het ons sou kry nie.

“Ons moes iets ontwerp wat by haar styl en smaak pas,” het mnr. Kotze gesê.

Hy het die hangertjie vier keer verander totdat hy daarmee tevrede was.

Hulle het hul eie onderneming waar hulle juweliersware ontwerp en maak.

Dié onderneming is nog nie eers ’n jaar oud nie en twee ander bekendes het hulle ook intussen genader om vir hulle ’n reeks juweliersware te ontwerp.

Mnr. Kotze was vroeër in die konstruksiebedryf en mnr. Van der Merwe het bemarking vir ’n motorhandelaar in Durban gedoen.

Mnr. Van der Merwe se ouers het ’n juwelierswinkel besit.

Mnr. Kotze moes egter eers leer om pêrels te span en juwele te maak.