Kotie en Alet Koen verruil Bethal vir Albertinia na 54 jaar
Hulle sien uit na meer tyd saam met familie en kleinkinders en die see.
BETHAL – Om na 54 jaar weg te trek, is nie maklik nie en mnr. Kotie Koen (80) het bewoë geraak toe hy daaroor gepraat het.
Hy en me. Alet Koen (77) verhuis aan die einde van die maand na Albertinia in die Wes-Kaap.
Mnr. Koen is 54 jaar gelede deur Nestlé vanaf Robertson na Bethal oorgeplaas.
Nestlé het ’n fabriek op Bethal oopgemaak en mnr. Koen moes help om dinge vlot te laat verloop.
“Ek en my vrou was pas getroud en ek het vir hulle gesê ek sal na Bethal toe trek, maar as ek na ses maande nie gelukkig is nie, wil ek teruggaan Kaap toe,” het mnr. Koen gesê.
“Dit was ‘ok’ na ses maande en ons het besluit om te bly.”
Die Koen-egpaar is hartseer om Bethal te verlaat en mnr. Koen het gesê daar was baie goeie en slegte tye.
Hy het grond gehuur en deeltyds met beeste en skape begin boer terwyl hy gewerk het.
Mnr. Koen het later by Nestlé bedank en ’n motorhandelaar geword.
Lees ook: Valerie van den Berg van Secunda geniet nou ’n rustiger lewe
Hy het sy onderneming later verkoop en sy eie windpomponderneming begin.
Dit het eintlik toevallig gebeur toe ’n boer hom geskakel en gevra het vir hulp om sy windpomp reg te maak.
“Hy het vir my gesê daar is ’n aanvraag vir iemand om windpompe reg te maak en ek moet so ’n onderneming begin.”
Mnr. Koen het dié onderneming vir 23 jaar gehad en bykans 2 000 windpompe in die omgewing reggemaak en gereeld gediens.
Hy was ’n ywerige gholfspeler en was 45 jaar lid van Bethal Gholfklub, terwyl me. Koen graag netbal gespeel het.
Mnr. Koen kan egter nou nie meer gholf speel nie, want sy been pyn as hy te veel loop.
Me. Koen het skoolgehou op Bethal en later as boekhouer by verskeie ondernemings gewerk.
Die egpaar se dogter, me. Welma Stormond, wat op Danabaai woon, het drie jaar gelede haar Springbokkleure in hoogspring verwerf.
Mnr. Koen se broer en suster woon in Albertinia en het sowat 15 jaar gelede vanaf Mpumalanga na hul geboortedorp teruggetrek.
Een van die egpaar se twee dogters en kleinkinders woon ook in die Kaap.
Die egpaar sien daarna uit om meer tyd met hul familie en kleinkinders te bestee en gereeld see toe te gaan.
Hulle is al 54 jaar getroud en mnr. Koen het spottend gesê me. Koen se stokperdjies behels skoonmaak van die oggend tot die aand.
“Ons is hartseer om weg te gaan, maar ons sien ook daarna uit om op Albertinia te gaan woon.
“Ek wil vir al my vriende, kliënte en kollegas op Bethal sê baie liefde en dankie vir hul getroue ondersteuning deur die jare.”
