Individue en sakemanne van Louis Trichardt het Sondag ‘n reuse skenking aan Pietersburg Helpgroep (PHG) gemaak.
Samaritane van dié buurdorp het vier bakkievragte aartappels, mieliemeel en klere by PHG se store op die Leeuwkuil-hoewes afgelewer.
“Ons ontvang soveel skenkings in Louis Trichardt en het besluit om na Polokwane uit te reik omdat die behoefte in die stad soveel groter is,” sê Helena van den Heever.
Dié inisiatief is volgens haar deur individue en besigheidseienaars gestig wat produkte van boere en sakelui insamel en soos nodig versprei. “Altesaam 2,5 ton aartappels, een ton mieliemeel, klere en skoene is ingesamel. Nie-bederfbare produkte soos tandepasta en seep sal tydens ‘n volgende geleentheid na Polokwane vervoer word,” sê Van den Heever.
Sy het haar dank teenoor veral Phllip en Louise Fick van Alldays en Corrie Derksen van Louis Trichardt vir hul bydraes en almal wat skenkings gemaak het uitgespreek.
PHG-verteenwoordiger, Petro du Preez, sê die produkte sal aan verskeie shelters in en om die stad uitgedeel word en het die groep donateurs vir hul ruimhartigheid bedank.
Storie en foto: RC Myburgh
>>rc.observer@gmail.com