Bosveld atlete hou Limpopo se naam hoog
Wian Prinsloo, Petri Grobler, Micke Prinsloo en Gerard Kruger het Potties se naam hoog gehou in dié span, waar ongeveer 1 000 atlete van regoor die land meegeding het.
MOKOPANE – Plaaslike atlete was goed verteenwoordig tydens die Suid-Afrikaanse tweekampkampioenskappe verlede naweek in Bloemfontein.
Wian Prinsloo, Petri Grobler, Micke Prinsloo en Gerard Kruger het Potties se naam hoog gehou in dié span, waar ongeveer 1 000 atlete van regoor die land meegeding het.
Die kriteria by die SA’s vereis dat die junior atlete ‘n 400m moet hardloop in ‘n sekere tyd, saam met ‘n 50m swem in ‘n sekere tyd waarvan die punte dan bymekaar getel word.
Die senior atlete moet ‘n 800m hardloop en ‘n 100m swem in ‘n sekere tyd.
“Daar was ongelooflik baie atlete met baie talent. By die o/19-seuns het die top atleet die 800m gehardloop in ‘n tyd van 01:57.99 wat briljant is en die swemtyd vir 100m was 00.55.70.
Die standard is baie hoog,” vertel Armanda Kruger.
Wian Prinsloo het in die seuns o/11 deelgeneem en sy hardlooptyd was 01:23.99 en sy swemtyd 00:44.75 wat vir hom ‘n totaal gee van 2022.27 punte en hy behaal die 62ste plek uit 85 atlete.
Petri Grobler neem deel in die seuns o/15 en behaal ‘n hardlooptyd van 02:29.50 en ‘n swemtyd van 01:05.55, en dit besorg aan hom ‘n totaal van 2064.25 punte wat hom 11de op die telbord plaas uit 70 atlete.
Micke Prinsloo neem deel in die meisies o/17 en hardloop ‘n tyd van 02:40.04, sy swem ‘n tyd van 01:13.36 en behaal ‘n totaal van 2034.12 punte – sy lê 16de op die telbord uit 75 atlete.
Gerard Kruger het in die seuns o/19 afdeling deelgeneem en hardloop ‘n tyd van 02:21.48, met ‘n swemtyd van 01:15.87 wat vir hom ‘n totaal gee van 1975.69 punte, en hy behaal die 46ste plek uit 63 atlete.
