Pret by La Wiida Leersentrum se Gholfdag
Gholfspelers van oud tot jonk het op die skoonveld van die Polokwane Gholfklub saamgekom vir die jaarlikse La Wiida Leersentrum Gholfdag.
POLOKWANE – Dié gholfdag het 124 spelers gelok wat op Vrydag, 20 April hul bes gedoen het om as wenners uit die vierbal-stryd te tree.
Net na die prysuitdeling het Afrikaanse sanger, Hugo, spelers en hul families vermaak terwyl hulle gesellig by die 19de putjie kon kuier.
PanSolutions was die gholfdag se hoofborg en het gesorg dat spelers vir hul vernuf beloon was. Raoul van Zyl was die gholfdag se organiseerder en Valerie O’Reilly, eienaar van La Wiida Leersentrum, sê die dag was ‘n reuse sukses te danke aan almal se bydrae.
“Ons bedank die spelers en almal wat putjies geborg het. Altesaam 31 spanne het aan die gholfdag deelgeneem en ons bedank die borge vir die wonderlike pryse asook die mense wat ons veiling ondersteun het.”
Langste afslaan by die sewende putjie was deur Liano Viviers gespeel terwyl Morné Myburg dié eer by die 17de putjie ingepalm het.
Tony Hawken, Jan de Beer, Boet Smit en Wynand Swanepoel se span het as wenners uit die stryd getree. Kort op hul hakke was die span van Danie le Roux, Johan le Roux, Paul Grobler en Jaco Laas.
Nic Notley, André Halgreen, Russel Güche en Riaan Nel se span het ‘n derde plek opgeraap.