Potties klop Letaba
Daar was geen keer aan die agterlyn van Potties se eersterugbyspan wat soos 'n wegholveldbrand laat waai het teen Letaba.
MOKOPANE – Die agterspelers van die eerstespan sorg verlede Saterdag vir 10 drieë op die veld van Hoërskool Piet Potgieter en wen Letaba met 60-19.
Die Fire-Quip Pottiesspan is aan die brand in die Boet Fickliga en maak van elke wedstryd gebruik om hulle self op te skerp vir die uitspeelwedstryde wat later voorlê. Die wedstryd was in ‘n goeie gees gespeel en Letaba het selfs drie keer agter Potties se doellyn gekuier.
Die wedstryd was vinnig op dreef en teen halftyd was die telling reeds 43-7 in Potties se guns. Potties speel graag in makliker wedstryde hulle jong opkomende spelers om hulle sodoende die nodige blootstelling op hierdie vlak te gee. Die jongmanne het hulle hande opgesteek en hulle waarde tot die klub gewys. Wikus Pretorius is as voorspeler van die wedstryd aangewys en Adriaan Laidlaw as agter- en algehele speler van die wedstryd.
Drieë is gedruk deur Collin Steyn (1), Hans du Plessis (2), Anthony Hawken (2), Adriaan Laidlaw (2) en Juan Nel (3). Jan Vorster en Anthony Hawken verdoel elk twee drieë.
Potties se tweedespan sorg ook vir ‘n eerste wen die seisoen met die eindtelling 42-7. Die voorspelers het van die afskop af die skrums en afbreekpunte gedomineer en die agterlyn het gesorg vir goeie balverspreiding
Potties druk agt drieë toe Ruan Potgieter (2) Paul Grobler (2), Terrance Makgwale, Dirkie Oosthuizen, Léan Lensley en Daantjie Bruwer agter die pale gaan kuier.
Die klub sê in ‘n persverklaring met al die nuwe geesdrif behoort die tweedespan die uitspeelwedstryde te haal. ‘n Spesiale dank aan al die afrigters, asook die hoofborg Fire-Quip, Wimpy en Pro-Plum Orchids.
redakteur.bosvelder@nmgroup.co.za
