Karateka nou ‘n 3de dan

Jaco Conradie van Pie-tersburg JKA Karateklub het op 27 September sy derde dan swartgordel verwerf.

Conradie is een van net vier karatekas van Suid-Afrika wat vir ‘n derde dan swartgordel gekwalifiseer het tydens ‘n gradering by die Mandeville Sportsentrum in Johannesburg.

Die gradering is waargeneem deur ses sesde en sewende dan gradeerders en het uit drie ure van oefening en een uur van gradering bestaan.

“Jaco het 10 jaar gelede by die klub aangesluit en hier met ‘n geel gordel begin,” het Piet van Rensburg, ‘n instrukteur by Pietersburg JKA Karateklub, oor Conradie se loopbaan gesê.

“Hy is ‘n geduldige instrukteur en het ‘n goeie karakter. Hy is ook bereid om hard te werk en is getrou by oefeninge.”

“Ek sien klaar daarna uit om my vier-de dan te verwerf,” het Conradie, wat in die top 10 van die nasionale JKA-kam-pioenskappe geëindig het en ‘n gesamentlike agtste plek vir kata verwerf het, gesê.

Hy het gesê hy beoog om oor vier jaar sy vierde dan-gradering te voltooi.