Rolbalspelers stel hul spel ten toon
Die jaarlikse Nyl Rolbaltoernooi het verlede naweek 104 ywerige spelers gelok en vir strawwe kompetisie in die tweedagstryd gesorg.
MOKOPANE – Die 26 spanne bestaande uit vier spelers elk het kort-kort in mekaar se nek geblaas, maar teen Sondagmiddag het Pedri de Villiers (Klub Belgravia), James Galloway (Klub Belgravia), Pikkie Nortje (Klub Naboomspruit) en Sarel Kruger (Klub Belville), die voortou geneem en as wenners uit die stryd getree.
Ben Groenewald, Fanie Otto, Louretto Otto en Annemarie van der Merwe van Louis Trichardt het ‘n tweede plek opgeraap en Elize Aschenborn, Johan du Toit, Floff du Toit en Kleintjie O’Connel van Groblersdalklub het ‘n derde plek beklink.
Die Potgietersrus Rolbalklub bedank die vyf studente van die Universiteit van Pretoria wat as deel van hul welwillendheidstaak die rolbalbane voor die toernooi opgeknap het. Die klub bedank hulle borge vir getroue ondersteuning.
