POLOKWANE – Oupas en Oumas is daardie mense wat kinders toelaat om aan soetgoed te smul ‘n halfuur voor aandete. Hulle is daardie mense wat trane afvee en altyd die einas raaksien.
Om hierdie mense in hulle kleinkinders se lewens te herdenk, het Akademie Reformia se Kleinbegin Kleuterskool verlede week hulle jaarlikse Oupa-en-Oumadag aangebied.
Soos die eregaste wat hulle is, het die oumas en oupas in die banke ingeskuif, gereed vir ‘n oggend om te onthou.
Die kleuters het hulle verwelkom met liedjies en gediggies waarna daar ‘n speletjie gespeel is.
Tydens die speletjie word die kleuters ‘n vraag gevra en oupa en ouma moet raai wat die kleuters sal antwoord.
Vrae soos, ‘wil jy eerder ‘n vinnige of ‘n slim maatjie hê’, ‘weet jy waar jou nek is’ en ‘hou olifante van roomys’, is van die vrae wat aan die kleuters gestel is.
Na afloop van die verrigtinge, kon die oumas en oupas heerlike sop en broodjies geniet terwyl die kleuters aan soetgoed kon smul.
