POLOKWANE – Laerskool Pietersburg-Oos se gr. 7-leerders het Vrydag ‘n entrepreneursdag by die skool gehou as deel van die ekonomiese en bestuurswetenskappe (EBW) kurrikulum.
Behalwe vir die sakebedrywighede was dit ‘n groot geleentheid, met altesaam 70 stalletjies waar leerders hulle items in groepe verkoop het.
Die graadgroep het drie weke gehad om vir die dag te beplan, en EBW-onnie Celeste Lange vertel dit het begin by marknavorsing.
“Hulle moes ‘n opname hou om te sien watter produkte hulle voornemende kopers sou koop, en hoeveel hulle bereid sou wees om te betaal. Hulle moes ook ‘n swot-analise doen om te sien waar hulle konsep se sterk punte en tekortkominge is.”
Daarby moes leerders ook ‘n kontrolelys hê waarop aankope, asook verkope aangedui is.
Sy vertel dat die tydfaktor ‘n groot oorweging was.
“Die leerders moes alles self hanteer, sonder om hul ouers te betrek – van die stalletjies opslaan tot die bemarking en verkope self.”
Die grootste les, is dat die leerders doelwitte moes hê en leer hoe om daarby uit te kom.
