POLOKWANE – Jy sien hulle daagliks wanneer jy bestuur. Hulle bedel by die verkeerslig of stap doelloos iewers heen.
Dis die stad se straatbewonders, daardie mense wat voor winkelvensters op die sypaadjie slaap, wat hulle beddegoed moet wegsteek voor dit gesteel word.
Kosmos Angels, onder leiding van Bertie Nel, het verlede jaar ‘n aksie geloods waarin diegene wat op straat woon, hulleself kan was en skoonkry om ‘n bietjie menswaardigheid te kan terugkry.
“Ons nooi 100 hawelose mense uit die gemeenskap om op 26 Oktober van die geleentheid gebruik te maak om te kom stort. Die doel van die geleentheid is om hierdie mense vir een dag te bederf,” sê Nel.
Hy voeg by dat die mense ook hulle hare en baarde kan sny en daar sal vrywillers wees wat hulle hande en voete gaan bederf.
Andrew Doyle het ‘n perdesleepwa in ‘n stort omskep en elke persoon kry ‘n stel klere, onderklere en skoene.
“Daar word ook na hulle gesondheid omgesien met ‘n gesonde ete. Op geestelike vlak sal hulle ook berading ontvang.”
Daar sal ook ‘n koffiestasie, en varsgebakte pannekoek en kolwyntjies wees om aan te smul. Nel sê hulle het vir Sanca Limpopo genooi om beskikbaar te wees vir hulp
en ondersteuning.
Volgende items nodig:
• Mans- en vroueklere in verskillende groottes.
• Dames onderklere, verkieslik nuut.
• Mans lang- en kortbroeke.
• Hemde en T-hemde vir mans.
• Onderklere en kouse, verkieslik nuut.
• Hoede, pette en musse.
Skenkings kan by Mariza Pelser (van Heart-Drive/Heart-Cycle) of by Bertie Nel (066 226 5011) afgelewer word.
“Verlede jaar was ‘n groot sukses en het ons ses hawelose mense onder meer gehelp om by ‘n rehabilitasieprogram aan te sluit en weer hulle plek in die gemeenskap vol te staan. Vanjaar wil ons nog meer hawelose mense bereik,” het Nel afgesluit.