MOKOPANE – As familie het hulle bly hoop dat die man wat verantwoordelik was vir haar man se dood in 2022, aan die pen sou ry.
So het Fransie Pienaar, die vermoorde plaaslike prokureur Schalk Pienaar se weduwee, verlede week opgemerk na Tsholofelo Joseph Motsoane, die beskuldigde in die moordsaak in die Hooggeregshof in Polokwane vrygespreek is.
Motsoane het tereggestaan op aanklagte van moord, sameswering tot moord en vuurwapenverwante klagtes, en was vermoedelik die bestuurder van die wegkommotor na Pienaar geskiet is.
Lees ook: Schalk Pienaar-moordsaak: Borg nie toegestaan
Bosveld het voorheen berig hoe Pienaar op 19 September 2022 vermoor is, kort nadat hy by die huis aangekom het.
Hy is 10 keer in sy motoroprit geskiet en het in sy vrou se arms gesterf. Motsoane is ‘n maand later gearresteer.
AfriForum se Privaatvervolgingseenheid, wat die Pienaar-gesin verteenwoordig en vergesel het na die hof, het in ‘n mediaverklaring bevestig die enigste getuienis wat Motsoane met die saak verbind het, was sy bekentenis. Die regter het egter beslis dat dit alleen nie genoeg was om hom skuldig te bevind nie.
Lees ook: Pienaarmoord: Verdagte hoor dán oor borg
Barry Bateman, woordvoerder van die eenheid het bygevoeg dat die vervolgingseenheid uiteraard teleurgesteld is oor die saak se uitslag en beplan om binnekort ‘n vergadering met die Pienaargesin te hê.
Fransie het aan Bosveld vertel hoe traumaties die hofverrigtinge vir hulle gesin was.
“My familie is stukkend en dis baie traumaties om elke keer deur die hofverrigtinge te sit en keer op keer die dag te beleef wat my geliefde van my af weggeskeur is. Dit is moeilik om deur hierdie verrigtinge te sit, en nog moeiliker om aan te beweeg met jou lewe as daar geen uitsluitsel is nie. Ek is baie teleurgesteld oor die uitkoms en is nog onseker wat die pad nou vorentoe is maar ek is dankbaar teenoor AfriForum vir hulle ondersteuning.”
Sy vertel hoe hulle familie vroeër vanjaar, toe daar in Motsoane se borgtogaansoek verwys is na sy uitgebreide misdaadgeskiedenis wat terugdateer tot 2003 en die feit dat hy reeds vonnisse uitgedien het vir afsonderlike sake van poging tot moord, roof en diefstal, “gehoop het dat die misdadiger aan die pen sal ry”.
Motsoane is in daardie tyd ook daaraan skuldig bevind dat hy uit aanhouding ontsnap het terwyl hy verhoorafwagtend was oor twee van die sake.
“Schalk het in geregtigheid en die regstelsel geglo en ek glo steeds Schalk gaan ook sy dag in die hof kry,” het Fransie afgesluit.
