Breinaalde klap om ander te help
Polokwane se Grannies Who Care werk saam met Ons Tuiste om mussies en handverwarmers vir kanker- en Alzheimerpasiënte te brei.
![](https://images.caxton.co.za/wp-content/uploads/sites/68/2024/08/Grannies-who-care-Medium-Small-780x395.png)
POLOKWANE – In Polokwane is daar ‘n groep vroue wat brei, wat ‘n verskil maak in ander mense se lewens – of dit nou die kankerpasiënte in die Pietersburg Provinsiale Hospitaal is of die inwoners van ‘n ouetehuis, daar word vir hulle gebrei.
Die vroue is Polokwane se eie Grannies Who Care.
Die oorspronklike Grannies Who Care is ‘n organisasie sonder winsbejag wat in Johannesburg gevestig is.
Hulle help dikwels ook Polokwane se oumas met breiprojekte.
Dié vroue het onlangs mussies gebrei wat hulle aan Ons Tuiste geskenk het.
Ons Tuiste verskaf die wol aan die breiers en wanneer hulle weer die mussies terugkry, word dit aan die Tough Living with Cancer-saal by die provinsiale hospitaal geskenk.
Daar word ook ander items gebrei soos handverwarmers.
Carin Meintjes, bestuurder by Ons Tuiste, verduidelik dat dié handverwarmers nie gewone handskoene is nie.
“Die verwarmers word in die rondte gebrei en versier met tossels en ander items wat deur die Alzheimerpasiënte gevryf kan word. Dit stimuleer pasiënte en hou hulle rustig. Ons wil ook die boodskap aan ons inwoners en personeel oordra dat ons as Ons Tuiste nie net ontvang nie, maar ook teruggee,” het sy opgemerk.
![](https://images.caxton.co.za/wp-content/uploads/sites/68/2022/03/lATEST-FOLLOW-800x291.png)